BREAKING NEWS
imageproxy

போர்க்குற்றவாளிகளுக்கு பொதுமன்னிப்பு வழங்குவதை ஏற்கவே முடியாது என்று சுமந்திரன் தெரிவித்துள்ளார்

183

போர்க் காலத்தில் இடம்பெற்ற மனித உரிமை மீறல்கள், மனித குலத்துக்கு எதிரான குற்றங்கள் போன்றவை தொடர்பில் முறையான நீதி விசாரணைகள் நடைபெற்று முதலில் உண்மைகள் கண்டறியப்பட்டு வெளிப்படுத்தப்பட வேண்டும் என்று நாடாளுமன்ற உறுப்பினர் சுமந்திரன் தெரிவித்துள்ளார்.

முதலில் உண்மைகள் கண்டறியப்பட்டு வெளிப்படுத்தப்பட வேண்டும் எனவும், படையினரில் யார், யார் எத்தகைய குற்றங்களை இழைத்தார்கள் என்பது வெளிப்படுத்தப்பட வேண்டும் என்றும், அதன் பின்னரே பொதுமன்னிப்பு பற்றி ஆராயவோ, பரிசீலிக்கவோ முடியும் என்றும் அவர் கூறியுள்ளார்.

முகம் தெரியாத குற்றவாளிகளுக்கு பொதுமன்னிப்பு அளிப்பதாக பிரகடனப்படுத்துவதன் மூலம் போர்க்குற்றங்களை மூடி மறைத்து, நீதியான விசாரணைகளை புறந்தள்ளும் செயற்பாட்டுக்கு இணங்கப்போவதில்லை எனவும், அந்த முயற்சியை வன்மையாக எதிர்ப்போம் என்றும் அவர் குறிப்பிட்டுள்ளார்.

தென்னாபிரிக்கா போன்ற நாடுகளில் போரின் பின்னர் நல்லிணக்கத்தை ஏற்படுத்தும் நடவடிக்கையாக பொதுமன்னிப்பு அளிக்கப்பட்டது உண்மையே என்ற போதிலும், அங்கு உண்மைகள் முழுமையாக கண்டறியப்பட்டு, நீதி நிலைநாட்டப்பட்டு, குற்றமிழைத்தோர் அடையாளப்படுத்தப்பட்ட பின்னரே அந்த பொதுமன்னிப்பு வழங்கப்பட்டது என்பதையும் அவர் சுட்டிக்காட்டியுள்ளார்.

இங்கும் விடுதலைப்புலிகள் தரப்பில் அரசுக்கு எதிராக ஆயுதம் ஏந்திப் போராடினார்கள் என்று குற்றம் சுமத்தப்பட்ட போராளிகள் உட்பட அனைவரும் அதற்காக கைது செய்யப்பட்டு விசாரிக்கப்பட்டு, உண்மைகள் கண்டறியப்பட்டன எனவும், அதன் பின்னரே சுமார் 12,000 போராளிகளுக்கு மன்னிப்பு அளித்து விடுவிக்கப்பட்டார்கள் எனவும், புனர்வாழ்வு என்ற வகையில் கூட அவர்கள் தடுப்பை எதிர்கொண்ட பின்னரே விடுவிக்கப்பட்டனர் என்றும் அவர் விபரித்து்ளளார்.

பெரிய குற்றங்களை இழைத்தோர் அதற்காக விசாரிக்கப்பட்டு, தண்டிக்கப்பட்டு, சிறை வைக்கப்பட்டனர் எனவும், இன்னும் பலர் சிறையில் இருக்கின்றனர் – பலர் தடுப்புக் காவலில் வாடுகின்றனர் என்பதையும் அவர் சுட்டிக்காட்டியுள்ளார்.

அப்படி எல்லாம் இருக்கையில் ஒட்டுமொத்தமாக படையினருக்கு பொதுமன்னிப்பு என்ற அறிவிப்பு மூலம் அவர்கள் இழைத்த குற்றங்களையும், குற்றவாளிகளையும் மூடிமறைக்கும் எத்தனத்துக்கு இடமளிக்க போவதில்லை எனவும், இலங்கை அரச தரப்பின் அத்தகைய மூடி மறைப்பு ஏற்பாட்டுக்கு அனைத்துலக சமூகம் ஒருபோதும் உடன்படாது என்று நம்புவதாகவும் சுமந்திரன் மேலும் தெரிவித்துள்ளார்.




Leave a Reply

Your email address will not be published. Required fields are marked *